اوزبیکستان: سمرقند بهترین مکان برای گفت‌وگوهای صلح
عبدالعزیز کاملوف، وزیر امور خارجه اوزبیکستان؛ با توجه به جایگاه و اهمیت تاریخی شهر سمرقند در میان جوامع اسلامی، این شهر بهترین مکان برای گفت‌وگوهای صلح افغانستان است.
نگاه نو_ آقای کاملوف این سخنان را در دیدار با صلاح‌الدین ربانی، همتای افغان خود مطرح کرده است. وزارت امور خارجه روز شنبه، بیست‌وهشتم ثور، در خبرنامه‌ای از دیدار آقای ربانی با کاملوف خبر داده است. این دیدار در شهر دوشنبه، پایتخت تاجیکستان، انجام شده است و در آن دو طرف در مورد گسترش روابط سیاسی، اقتصادی، همکاری‌های منطقه‌ای و امضای موافقت‌نامه استراتژیک میان دو کشور بحث کرده‌اند.
مقام‌های اوزبیکستان پیش از این هم آماده‌گی کشورشان را برای میزبانی از مذاکرات مستقیم میان حکومت افغانستان و گروه طالبان در شهر سمرقند اعلام کرده بودند.
عبدالعزیز کاملوف، وزیر خارجه اوزبیکستان و ویکتور محمودوف، مشاور امنیت ملی این کشور، در یازدهم حمل امسال در دیداری با رییس جمهور غنی، ضمن حمایت از روند صلح به رهبری و مالکیت حکومت افغانستان، گفته بودند، در صورتی که طالبان آماده مذاکرات مستقیم با حکومت افغانستان باشند، اوزبیکستان آماده است در سمرقند، این مذاکرات را میزبانی کند.
اوزبیکستان از همسایه‌های شمالی افغانستان است. این کشور بارها اعلام کرده است که آماده هر نوع همکاری در زمینه تسهیل گفت‌وگوها و برقراری صلح در افغانستان است. اوزبیکستان در ماه حمل سال گذشته میزبان یک نشست بین‌المللی در مورد صلح افغانستان بود. در این نشست نماینده‌گان ۲۳ کشور جهان در سطح وزرای خارجه شرکت کرده بودند.